🌾🚜 “खेत बचाओ अभियान” अंतर्गत अंकोली येथे किसान गोष्टी व कृषी जनजागृती कार्यक्रम उत्साहात संपन्न 🚜🌾
🌱 कृषी विभाग महाराष्ट्र शासन, कृषी तंत्रज्ञान व्यवस्थापन यंत्रणा (आत्मा) सोलापूर, कृषी विज्ञान केंद्र मोहोळ तथा महात्मा फुले कृषी विद्यापीठ राहुरी यांच्या संयुक्त विद्यमाने शेतकऱ्यांना शाश्वत, पर्यावरणपूरक व आधुनिक शेतीचे मार्गदर्शन 🌱
✍️ अंकोली प्रतिनिधी : दादासाहेब जगताप संविधान न्यूज चॅनल व पोर्टल सहसंपादक.
महाराष्ट्र शासन कृषी विभाग, कृषी तंत्रज्ञान व्यवस्थापन यंत्रणा (आत्मा) सोलापूर तसेच महात्मा फुले कृषी विद्यापीठ, राहुरी अंतर्गत कृषी विज्ञान केंद्र, मोहोळ यांच्या संयुक्त विद्यमाने दि. ११ जून २०२६ रोजी मौजे अंकोली (ता. मोहोळ) येथे “खेत बचाओ अभियान” अंतर्गत किसान गोष्टी व कृषी जनजागृती कार्यक्रम उत्साहात संपन्न झाला. सदर कार्यक्रम डॉ. कांताप्पा भिमराया खोत, प्रकल्प संचालक, आत्मा सोलापूर यांच्या अध्यक्षतेखाली अंकोली येथील मारुती मंदिरात आयोजित करण्यात आला होता.
🌿 कार्यक्रमास तालुका कृषी अधिकारी श्री. हर्षद निगडे साहेब, मंडळ कृषी अधिकारी श्री. सतीश कोळेकर साहेब, कृषी अधिकारी श्री. सागर माने, अन्न प्रक्रिया शास्त्रज्ञ श्री. दिनेश क्षीरसागर, कीटक शास्त्रज्ञ श्री. पंकज मडावी साहेब यांच्यासह कृषी विभागातील अधिकारी उपस्थित होते.
🌱 यावेळी कृषी विज्ञान केंद्र, मोहोळचे शास्त्रज्ञ डॉ. विशाल वैरागर यांनी उपस्थित शेतकरी बांधवांना मार्गदर्शन करताना “खेत बचाओ अभियान” अंतर्गत रासायनिक खतांचा वापर कमी करून सेंद्रिय खतांचा वापर वाढविणे, जैविक निविष्ठांचा अवलंब करणे, जमिनीची सुपीकता टिकवून ठेवणे तसेच उत्पादन खर्च कमी करून शेती अधिक शाश्वत व फायदेशीर कशी करता येईल याबाबत सविस्तर माहिती दिली.
💧🌾 पाणी व्यवस्थापनावर विशेष भर देताना त्यांनी सांगितले की, भविष्यातील शेती ही “प्रत्येक थेंबाचे मूल्य” ओळखून करावी लागणार आहे. शेतकऱ्यांनी पिकांच्या गरजेनुसारच पाणी द्यावे, ठिबक सिंचन व तुषार सिंचनाचा अवलंब करावा, शेततळे, शेतबंधारे, पावसाचे पाणी साठवणूक आणि जलसंधारणाच्या उपाययोजना राबवाव्यात. कमी पाण्यात अधिक उत्पादन देणाऱ्या पिकांचा अवलंब करणे, जमिनीतील ओलावा टिकवून ठेवण्यासाठी सेंद्रिय खतांचा वापर वाढवणे तसेच पाण्याचा अपव्यय टाळणे ही काळाची गरज असल्याचे त्यांनी नमूद केले.
🌦️ बदलत्या हवामानामुळे अनियमित पाऊस, दुष्काळसदृश परिस्थिती व पाण्याची टंचाई यांचा शेतीवर मोठा परिणाम होत असल्याने “पाणी अडवा – पाणी जिरवा” या संकल्पनेचा स्वीकार करून शेतकऱ्यांनी उपलब्ध जलस्रोतांचे योग्य नियोजन करावे, असे आवाहन करण्यात आले.
🌾 तसेच कीड व रोग व्यवस्थापन, खतांचा संतुलित वापर, मृदा परीक्षणाचे महत्त्व, आधुनिक कृषी तंत्रज्ञानाचा अवलंब, हवामानानुसार पीक नियोजन, पीक विविधीकरण, जलसंवर्धन आणि शासनाच्या विविध कृषी योजनांची माहिती उपस्थित शेतकऱ्यांना देण्यात आली. उपस्थित शेतकऱ्यांनी विविध विषयांवर प्रश्न विचारून तज्ज्ञांकडून मार्गदर्शन घेतले.
👨🌾 कार्यक्रमास बीटीएम आत्मा अधिकारी, अंकोली गावचे सरपंच, ग्रामपंचायत सदस्य, प्रतिष्ठित नागरिक, महिला व पुरुष शेतकरी मोठ्या संख्येने उपस्थित होते. यामध्ये संदीप (काका) पवार, अजिंक्य शिरसागर, जयेंद्र पवार, सोमनाथ पवार, डॉ. नंदकुमार पवार, अभिमान पवार, भारत पवार, किशोर पवार, धनाजी सुरवसे, गणेश पवार, जितेंद्र कामतकर, दीपक पवार, संभाजी पवार, हनुमंत गुरव, जितेंद्र इंगळे, नागनाथ गुरव, सखी कृषी महिला गुरव व कामतकर परिवार, पांडुरंग पवार यांच्यासह गावातील लहान-थोर नागरिकांची उल्लेखनीय उपस्थिती होती.
🎙️ अध्यक्षीय समारोपात डॉ. के. बी. खोत यांनी शेतकऱ्यांनी आधुनिक तंत्रज्ञान, सेंद्रिय शेती, जैविक निविष्ठा आणि पाण्याचा काटेकोर व कार्यक्षम वापर यांचा अवलंब करून उत्पादनवाढ साधावी तसेच कृषी विभागाच्या विविध योजनांचा लाभ घ्यावा, असे आवाहन केले.
🌿🌾 “जमिनीचे आरोग्य जपा – पाण्याचा प्रत्येक थेंब वाचवा – पीक नुकसान टाळा – उत्पादन वाढवा” हा संदेश देणारा “खेत बचाओ अभियान” अंतर्गत आयोजित किसान गोष्टी कार्यक्रम यशस्वीरीत्या पार पडला. कृषी विभाग महाराष्ट्र शासन, कृषी विज्ञान केंद्र मोहोळ तथा महात्मा फुले कृषी विद्यापीठ राहुरी यांच्या संयुक्त प्रयत्नातून आयोजित या कार्यक्रमास शेतकरी, महिला वर्ग तसेच गावातील सर्व नागरिकांचा उत्स्फूर्त प्रतिसाद लाभला. शाश्वत शेती, जलसंवर्धन, आधुनिक तंत्रज्ञान आणि पर्यावरणपूरक कृषी पद्धतींचा प्रसार करणारा हा कार्यक्रम अंकोली गावासाठी मार्गदर्शक व प्रेरणादायी ठरला. 🌾💧🌱