यवतमाळ जिल्ह्यात अमली पदार्थविरोधी मोठी कारवाई….
एकाच दिवशी दोन छाप्यांत ५ आरोपी अटकेत
१० किलोहून अधिक गांजासह ७.७१ लाखांचा मुद्देमाल जप्त**
बालाजी शिंदे (प्रतिनिधी):
यवतमाळ जिल्ह्यात अमली पदार्थविरोधी मोहिमेला मोठे यश मिळाले असून, स्थानिक गुन्हे शाखा यवतमाळ व पोलीस ठाणे पुसद ग्रामीण यांच्या संयुक्त कारवाईत एकाच दिवशी दोन वेगवेगळ्या छापा कारवाईत एकूण ०५ आरोपींना अटक करण्यात आली आहे. या कारवाईत १० किलोपेक्षा अधिक गांजा व चारचाकी, दुचाकी वाहनांसह एकूण ७,७१,६०० रुपयांचा मुद्देमाल जप्त करण्यात आला आहे.
पहिली कारवाई – कळंब पोलीस ठाणे हद्दीत
दिनांक १४ डिसेंबर २०२५ रोजी स्थानिक गुन्हे शाखा यवतमाळचे पथक कार्यरत असताना गोपनीय माहिती मिळाली की, सैयद राहत अली उर्फ टकल्या सैयद अमजत अली (रा. यवतमाळ) हा आपल्या साथीदारांसह नागपूर येथून चारचाकी वाहनाद्वारे गांजा विक्रीसाठी कळंब मार्गे यवतमाळकडे येणार आहे.
या माहितीच्या आधारे वरिष्ठ अधिकाऱ्यांना कल्पना देऊन कायदेशीर प्रक्रिया पूर्ण करत नागपूर–कळंब–यवतमाळ रस्त्यावरील नरसापूर बसस्थानकासमोर रात्री सुमारे २३.०० वाजता सापळा रचण्यात आला. त्यावेळी संशयित निळ्या रंगाची स्विफ्ट कार (क्रमांक MH BF 8029) थांबवून तपासणी केली असता वाहनातील
1. श्रावण हरिदास फुलमाळी (वय २७, चालक)
2. प्रितमसिंग दामोदर रामटेके (वय ४०) – दोघेही रा. अशोक नगर, यवतमाळ
3. सैयद राहत अली उर्फ टकल्या (वय ५४), रा. सुराणा ले-आऊट, यवतमाळ
यांच्याकडून ८.०३० किलो गांजा (किंमत १,६०,६०० रु.), तीन मोबाईल फोन, चारचाकी वाहन व इतर साहित्य असा एकूण ६,९१,६०० रुपयांचा मुद्देमाल जप्त करण्यात आला. या प्रकरणी कळंब पोलीस ठाण्यात एन.डी.पी.एस. कायद्यान्वये गुन्हा नोंद करण्यात आला आहे.
दुसरी कारवाई – पुसद ग्रामीण पोलीस ठाणे हद्दीत
त्याच दिवशी पुसद ग्रामीण पोलीस ठाण्याच्या अधिकारी व अंमलदारांना गोपनीय माहिती मिळाली की, पुसद ते दिग्रस मार्गावर दुचाकीवरून गांजाची अवैध वाहतूक केली जाणार आहे. त्यानुसार सायंकाळी ७.३० वाजता ग्राम धुंदी परिसरात सापळा रचण्यात आला.
दुचाकी थांबवून तपासणी केली असता
1. शेख इसराईल उर्फ शेख बसीम (वय ३२), रा. संभानी नगर, दिग्रस
2. एजाज निजाम नौरंगाबादे (वय ३२), रा. गवळीपुरा, दिग्रस
यांच्याकडून २.०४१ किलो गांजा (किंमत ५०,००० रु.) व दुचाकी वाहन असा एकूण ८०,००० रुपयांचा मुद्देमाल जप्त करण्यात आला. या प्रकरणी पुसद ग्रामीण पोलीस ठाण्यात एन.डी.पी.एस. कायद्यान्वये गुन्हा दाखल करण्यात आला आहे.
एकूण निष्कर्ष
या दोन स्वतंत्र कारवाईतून एकाच दिवशी ०५ आरोपींना अटक, १० किलोपेक्षा जास्त गांजा व ७,७१,६०० रुपयांचा मुद्देमाल जप्त करून यवतमाळ पोलिसांनी अमली पदार्थ तस्करीविरोधात ठोस कारवाई केली आहे.
पोलीस अधिकाऱ्यांचे मार्गदर्शन
सदर कारवाई मा. पोलीस अधीक्षक यवतमाळ श्री. कुमार चिंतामन,
अपर पोलीस अधीक्षक श्री. अशोक थोरात,
उपविभागीय पोलीस अधिकारी उमरखेड/पुसद श्री. हनुमंत गायकवाड
यांच्या मार्गदर्शनाखाली पार पडली.
या मोहिमेत पोलीस निरीक्षक सतीश चवरे, सहाय्यक पोलीस निरीक्षक मनीष गावंडे, तसेच स्थानिक गुन्हे शाखा यवतमाळ व पुसद ग्रामीण पोलीस ठाण्याचे अधिकारी व अंमलदारांनी सहभाग घेतला.
✍️ (शुभांगो गुल्हाणे)
जनसंपर्क अधिकारी,
पोलीस अधीक्षक कार्यालय, यवतमाळ