महावितरण अधिकाऱ्यांना कडक आदेश : जळालेले ट्रान्सफॉर्मर त्वरित बदला, नागरिकांना सुरळीत वीजपुरवठा द्या

💥ऐन उन्हाळ्यात वीज संकटाचा कहर ; आमदार समाधान आवताडे यांची तातडीची दखल..

महावितरण अधिकाऱ्यांना कडक आदेश : जळालेले ट्रान्सफॉर्मर त्वरित बदला, नागरिकांना सुरळीत वीजपुरवठा द्या

⚡ शेतकरी, नागरिक आणि व्यापाऱ्यांचे हाल — कमी दाबामुळे मोटारी, उपकरणे बंद

⚡ ४५ ट्रान्सफॉर्मर ऑइलअभावी प्रलंबित ; प्रशासनाला तातडीच्या सूचना

⚡ नदीकाठच्या शेतीपंपांचा वीजपुरवठा त्वरित सुरू करण्याची मागणी….

📍 अंकोली प्रतिनिधी : दादासाहेब जगताप🌾संविधान न्यूज चॅनल व पोर्टल सहसंपादक,               

पंढरपूर-मंगळवेढा तालुक्यात ऐन उन्हाळ्यात निर्माण झालेल्या भीषण वीज संकटामुळे नागरिक, शेतकरी, व्यापारी तसेच सर्वसामान्य जनता हैराण झाली आहे. दिवसेंदिवस तापमानाचा पारा वाढत असताना दुसरीकडे वारंवार खंडित होणारा वीजपुरवठा, कमी दाबाने मिळणारी वीज, जळालेले ट्रान्सफॉर्मर आणि शेतीपंपांना अपुरा वीजपुरवठा यामुळे ग्रामीण भागातील परिस्थिती गंभीर बनली आहे. अनेक गावांमध्ये तासन्तास वीज गायब राहत असल्याने नागरिकांमध्ये संतापाचे वातावरण निर्माण झाले असून महावितरण विभागाच्या कारभाराविरोधात तीव्र नाराजी व्यक्त होत आहे.

या गंभीर परिस्थितीची दखल घेत पंढरपूर-मंगळवेढा विधानसभा मतदारसंघाचे कर्तव्यदक्ष आमदार समाधान आवताडे यांनी महावितरण विभागाच्या अधिकाऱ्यांची तातडीची बैठक घेत प्रशासनाला धारेवर धरले. नागरिकांना सुरळीत व अखंडित वीजपुरवठा देणे ही प्रशासनाची प्राथमिक जबाबदारी असून यामध्ये कोणतीही हलगर्जी सहन केली जाणार नाही, असा स्पष्ट इशारा त्यांनी अधिकाऱ्यांना दिला.

⚡ जळालेले ट्रान्सफॉर्मर तीन दिवसांत बदला

मंगळवेढा येथे झालेल्या बैठकीत आमदार आवताडे यांनी अनेक गावांमध्ये ट्रान्सफॉर्मर जळूनही अनेक दिवस बदलले जात नसल्याबद्दल तीव्र नाराजी व्यक्त केली. ट्रान्सफॉर्मर बंद असल्यामुळे संपूर्ण गाव अंधारात राहत असून नागरिकांना मोठ्या अडचणींना सामोरे जावे लागत असल्याचे त्यांनी सांगितले. जळालेले ट्रान्सफॉर्मर जास्तीत जास्त तीन दिवसांच्या आत बदलण्यात यावेत, असे आदेश संबंधित अधिकाऱ्यांना देण्यात आले.

🌾 शेतीपंपासाठी पूर्ण दाबाने आठ तास वीज देण्याचे आदेश

सध्या उन्हाळ्यामुळे शेतीपिकांना पाण्याची मोठी गरज आहे. अनेक शेतकरी विजेवर चालणाऱ्या मोटारींच्या माध्यमातून पिकांना पाणी देत आहेत. मात्र कमी दाबाने मिळणाऱ्या विजेमुळे मोटारी बंद पडत असून पिकांचे नुकसान होत आहे. यामुळे शेतकऱ्यांमध्ये तीव्र नाराजी निर्माण झाली आहे.

याची गंभीर दखल घेत आमदार समाधान आवताडे यांनी शेतीपंपासाठी पूर्ण दाबाने किमान आठ तास वीजपुरवठा करण्यात यावा, तसेच सिंगल फेज वीजपुरवठाही सुरळीत ठेवण्यात यावा, अशा स्पष्ट सूचना अधिकाऱ्यांना दिल्या.

🚰 पिण्याच्या पाण्याचाही प्रश्न गंभीर

वीजपुरवठा खंडित होत असल्यामुळे अनेक गावांमधील पाणीपुरवठा योजना विस्कळीत झाल्या आहेत. पाण्याच्या मोटारी बंद राहत असल्याने नागरिकांना पिण्याच्या पाण्यासाठी भटकंती करावी लागत आहे. दुसरीकडे कमी दाबामुळे घरगुती उपकरणे बंद पडत असून पंखे, कुलर, फ्रीज व्यवस्थित चालत नसल्याने नागरिक उकाड्याने त्रस्त झाले आहेत.

विशेषतः रात्रीच्या वेळी होणाऱ्या लोडशेडिंगमुळे ज्येष्ठ नागरिक, लहान मुले आणि रुग्णांना मोठा त्रास सहन करावा लागत आहे.

📞 पालकमंत्री आणि जिल्हाधिकाऱ्यांशी थेट संपर्क

बैठकीदरम्यान आमदार आवताडे यांनी पालकमंत्री जयकुमार गोरे तसेच जिल्हाधिकारी कार्तिकेयन यांच्याशी दूरध्वनीवरून संपर्क साधून पंढरपूर-मंगळवेढा तालुक्यातील गंभीर वीज समस्यांकडे लक्ष वेधले. विशेषतः नदीकाठच्या भागातील शेतीपंपांचा वीजपुरवठा त्वरित पूर्ववत करण्यात यावा, अशी मागणी त्यांनी प्रशासनाकडे केली.

🛢️ ४५ ट्रान्सफॉर्मर ऑइलअभावी बंद

यावेळी पंढरपूर-मंगळवेढा परिसरातील तब्बल ४५ ट्रान्सफॉर्मर ऑइलअभावी बंद असल्याचे निदर्शनास आले. त्यामुळे अनेक गावांमध्ये वीजपुरवठा विस्कळीत झाला आहे. ही बाब गंभीर असल्याचे सांगत आमदार आवताडे यांनी तातडीने आवश्यक ऑइल उपलब्ध करून संबंधित ट्रान्सफॉर्मर कार्यान्वित करण्याच्या सूचना विभागाला दिल्या.

⚠️ अधिकाऱ्यांना नागरिकांशी नम्रतेने वागण्याच्या सूचना

महावितरण विभागाच्या अधिकाऱ्यांनी नागरिकांच्या तक्रारी तत्काळ सोडवाव्यात, शेतकरी व ग्रामस्थांशी नम्रतेने आणि जबाबदारीने वागावे, अशा स्पष्ट सूचना बैठकीत देण्यात आल्या. वीजपुरवठा सुरळीत ठेवण्यासाठी अधिकारी आणि कर्मचारी यांनी समन्वयाने काम करावे, असेही आवाहन करण्यात आले.

🔥 नागरिकांमध्ये संतापाचे वातावरण

सततच्या वीज समस्येमुळे ग्रामीण भागातील नागरिकांमध्ये तीव्र नाराजी निर्माण झाली आहे. अनेक गावांमधून आंदोलनाचा इशारा देण्यात येत असून प्रशासनाने तातडीने उपाययोजना कराव्यात, अशी मागणी होत आहे. अशा परिस्थितीत लोकप्रतिनिधींनी स्वतः पुढाकार घेत प्रशासनाला धारेवर धरल्यामुळे नागरिकांना काही प्रमाणात दिलासा मिळाला आहे.

🟥 “नागरिकांना अखंडित वीजपुरवठा मिळाला पाहिजे. शेतकरी आणि सर्वसामान्य नागरिकांना त्रास होणार नाही यासाठी प्रशासनाने तत्काळ कार्यवाही करावी,”

— आमदार समाधान आवताडे